Salesianos Ourense acolleu os días 19 e 20 de setembro o Encontro de Formación de Animadores do Itinerario de Educación na Fe (IEF) da zona noroeste da Inspectoría Santiago o Maior, no que participaron máis dun centenar de educadores e educadoras dos centros xuvenís do territorio.
A sesión inicial do sábado comezou ás 10.00 horas coa acollida dos participantes e unha oración conxunta. Deron a benvida Eusebio Martínez, director da casa salesiana de Ourense; Ángel Fragata, en representación da Federación de Centros Xuvenís Don Bosco de Galicia; e Diego Borbolla, coordinador inspectorial de Animación Vocacional.
Formación por etapas educativas
O programa formativo da mañá organizouse por etapas do itinerario, tomando como fío condutor común o concepto do espazo e o universo.
A sesión dirixida a preanimadores e animadores de primeiro ano, «A galaxia do animador, da animadora», foi impartida por Santi Domínguez. O equipo de Andaina e Saltimbanquis desenvolveu «A galaxia infantil», dirixida ao monitorado das etapas de 6 a 11 anos. Os pedagogos Alejandra de la Iglesia e Luis Carrera conduciron «A galaxia preadolescente», destinada aos educadores da etapa ADS. Carlos Hermida impartiu «A galaxia do adolescente» para os animadores das etapas de Adolescentes, Xuventude e Catecumenado.
As sesións por etapas continuaron ata a hora do xantar, co obxectivo de afondar nas características e nas necesidades educativas propias de cada tramo de idade.
Obradoiros especializados
A tarde do sábado destinouse á formación práctica, organizada en dúas quendas de obradoiros ás 16.00 e ás 18.00 horas.
O equipo de Andaina e Saltimbanquis impartiu o obradoiro «Cando falla o plan: responder, acompañar e educar». Tamara Pérez dirixiu a sesión «Animación e acompañamento a nenos e nenas con necesidades específicas de apoio educativo (ACNEAE)». A etapa ADS contou co obradoiro «Comeza a aventura», a cargo de Alberto López, profesor de Salesianos Vigo, e cun espazo de «Tempo de desconexión» conducido por Xulio César Iglesias sobre unha proposta elaborada por Manuel Alvite. Os animadores das etapas de Adolescentes, Xuventude e Catecumenado participaron no «LabVocacional», moderado por Diego Borbolla, e nun foro propio posterior.
A xornada do sábado pechouse cunha celebración arredor do lema pastoral do curso, «Esta é a túa casa», presidida polo inspector José Carlos Sobejano.
Asembleas por movementos
O domingo comezou ás 10.00 horas cunha oración conxunta, á que seguiron as asembleas por movementos de Saltimbanquis, Andaina e ADS, espazos destinados á avaliación do curso anterior, á planificación da programación anual e á toma de decisións organizativas de cada etapa.
Ás 12.30 horas celebrouse a Eucaristía conxunta, presidida por Sergio Huerta, delegado de pastoral xuvenil. O encontro rematou ás 13.30 horas coas fotografías de grupo por movementos, federacións, comunidade salesiana e centros xuvenís, e concluíu ás 14.00 horas tras o xantar compartido.
Valoración dos participantes
Entre as achegas recollidas ao remate do encontro, Dani Martínez, responsable de Andaina, sinalou que o obradoiro sobre necesidades específicas de apoio educativo achegou «ferramentas reais» de aplicación directa na actividade semanal dos centros. Pola súa banda, Adrián Rodríguez, responsable de ADS, destacou a función das asembleas dominicais como instrumento de coordinación entre os equipos dos distintos centros.